][ يا بنت .. تعالي ابيك بسؤال خاص،، ليش تكلمينه ؟؟! ][

:+:{فدوة الغاليه}:+:

طبعا زي ما انتم شايفين ان قضية مكالمات البنات للشباب كل مالها وتزيد
ومواضيع كثيرة نزلت عن هالموضوع
بس بصراحه انصدمت صدمه كبيره لما اكتشفت ان كثير من بنات اعرفهم طايحين في هالعاده
فحبيت اسكتشف واسأل عن سبب انجراف البنات لمكالمة الشباب سواء في المسنجر أو في الجوال
وجمعت اجوبة من الكم بنت اللي سألتهم

فقالت وحدهـ:

انا اكلم لأني ابي من يفهمني ،، وما لقيت احد يفهمني الا هالشاب اللي اكلمه

هذي البنت تكذب على نفسها اولا واخيرا لأن مو معقولة من بين اهلها وقرايبها وصديقاتها وكل الناس اللي تعرفهم مالقت احد يفكر نفس تفكيرها أو يفهمها ..!!
ولو نلاحظ حكمة الله في خلق البشر نشوف انه جعل فيه تشابه بين الشخصيات
فأكيد بنكون قابلنا في الحياة ناس قدرنا نقول عنهم : احس شخصيتها مثل شخصيتي ،، او احس تفكيرها مثل تفكيري
فلو ان الله جعل لكل انسان شخصيه مختلفه وكل انسان له تفكير وطموحات معينه ولم يوجد تشابه بسيط بين شخصين لكان كل انسان في وادي لحاله ،، وما كنا قدرنا نتعايش مع بعض
ومن الطبيعي ان البنت تفهم البنت الثانيه اكثر من الولد خصوصا اذا كانو البنتين في نفس العمر
لأن البنات عندهم اشياء مشتركه مع بعض اكثر
وبعدين تعالوا نجبينها بالمنطق ،، البنت هذي لما رقمها الشاب سواء في سوق أو في سياره او أي مكان ..
هل حست علطول انه هو اللي بيفمها ،، وان شخصيته زي شخصيتها ؟
هذا اكبر دليل بانها تكذب على نفسها
ونصيحتي لها البنت اللي تتحجج بانها ما لقت من يفهمها انها تدور وتتعب في التدوير لما تلاقي بنت في نفس تفكيرها وبتقدر تفهمها ..

والثانيه تقول :

انا اكلم لأني احس بالحنان والامان

بالنسبه للحنان ... ياحبيبتي وين بتلاقين قلب حنون عليك اكثر من امك وابوك؟
حتى لو يعصبون عليك .. حتى لو يفشلونك قدام الله وخلقه .. حتى لو يضربونك..!
يضلون امك وابوك
تعرفين معنى كلمة ام وابو ؟
الام والابو اللي ربوك وتعبوا عليك وسهرو لراحتك .. فرحوا لفرحك وحزنوا لحزنك
شاركوك كل لحظات حياتك
مهما كانوا قاسين معاك .. مهما اخفوا حبهم لك .. يضلون يحبونك ويخافون عليك وعلى مصلحتك
ولو حاولتي تصلحين علاقتك معاهم .. تتقربين منهم ،، صدقيني هم بتتغير معاملتهم لك ووقتها بتحسين بالحنان اللي تدورين عنه
اما الأمان .. انا من وجهة نظري ما أظن ان الأمان في انك تنتظرين كل اهلك ينامون علشان تكلمين الشباب
ما أظن الامان في انك كل شوي تطلين من باب غرفتك وتتأكدين ان محد من اهلك صاحي ودرى عنك
ما أظن الأمان في انك اذا سمعتي صوت احد يمشي علطول سكرتي التلفون وتغطيتي بالمفرش لتوهمين اهلم بانك نايمه
ما أظن الامان في انك تهربين شريحه بدون ما يدرون اهلك
ما اظن الامان في انك تفكرين وتخططين وين بتوزين الجوال عن اهلك
اخواتي
الامان في انك تعيشين متطمنه
الامان في انك تحسين براحه نفسيه وانتي موجوده في أي مكان
الامان بوجودك حولين اهلك
الامان بقربك من الله
هذا هو الامان الحقيقي

والثالثه تقول :

انا ابي واحد اعيش معاه قصة حب ونهاية هالقصة الزواج !! وابطال المسلسلات موب احسن مني

انتي من نفسك قلتيها " المسلسلات " !!
يعني تمثيل مو صدق
لأن صدقيني ( الشي اللي من بدايته مبني على اساس غلط رح ينهدم مع الايام )وانتي لو تزوجتي هذا الشاب اللي تكلمينه ،، علاقتكم الزوجية بتكون فاشله ومارح تستمتر ( هذا اذا قبل يتزوج بك )
صحيح ان فيه ناس تزوجو من معرفة نت او معرفة جوال وحياتهم ماشيه عادي
بس انا اقول ان مع الايام بتفشل هالعلاقه
لأن الزوج بيظل في ذاكرته ان زوجته كانت تكلم ..!
والزوجه نفس الكلام.
ولو انحرفت وحده من بناتهم أو سوت نفس اللي سووه امها وابوها فأقل جمله ممكن يقولها الزوج (( اذا الأم كانت تكلم اجل البنت يحقلها تسوي بلاوي ..!! ))
وانا من ناحية ان البنت تكلم على اساس ان نهاية هالمكالمات هي الزواج..!
اخذت رأي بعض الشباب اللي يكلمون بنات ومعظمهم اتفقوا على رد وهو
مسسسسسستحيل اتزوج وحده تكلمني ..!
فسألت : طيب انت وعدها بالزواج ؟؟
الشاب : الكلام ببلاش وزي ما وعدتها فأنا وعدت غيرها عشر وعشرين
انا : طيب ايش السبب اللي يخليك ما تتزوجها ؟
الشاب : مثل ما كلمتني فهي اكيد كلمت غيري وانا ابي زوجتي تكون ملكي انا وبس
وكان جواب شاب ثاني : لأني بتكون علاقتي فيها مليانه شكوك ،،
والثالث : وانا وش يظمنلي انها مارح تكلم شباب بعد ما تتزوجني ،، لأن البنات اللي من هالنوع ما تستبعد عنها أي شي
والاخير قال : انا هالبنت مع اني اكلمها واسلوبي معها لطيف ورومنسي الا انتي استحقرها بقوة ومستحيل اتزوج وحده هي في نظري مجرد بنت حقيره ..!
انا ابي زوجتي تكون بنت ناس .. اخلاق .. ذوق .. اهلها عارفين يربونها ..

ياللي تنتظرين من هالحبيب يجي ويخطبك ،، شوفي وش قال عنك ،، ايش رايه فيك

البنت الرابعه

والأخيرهـ قالت : انا اكلم هالشباب لأني ابي اضيع وقتي واتسلى
تضيعين وقتك ؟ تتسلين؟
غريبه صراحة
حبيبتي اذا تبين تتسلين وتعبين وقت ترى فيه ألف شغله وشغله تسوينها
اشغلي نفسك بالقران
اشغلي نفسك بالاستغفار
واذا اذا تأزمت الأمور ترى فيه التلفزيون والبلايستيشن
فيه قراءة الروايات الطويله واللي تاخذ وقت
فيه النت
فيه اشياء كثيرة لو اعددها ما خلصت ..!

وبصراحه فيه اسباب كثيرة انقالت لي عن اسباب مكالمة الشباب ولكني اكتفي بهالأربع اجوبة

[نصيحتي لك يا ختي]

(( خلي نفسك عالية رفيعه محد يقدر يمسك بكلمة ولا احد يقدر يمسك عليك زلة بسيطه ))
(( وخليك واعية اكثر لنفسك ولسمعتك ))
ترى الناس مايرحمون في كلامهم واذا احد مسك عليك شي بسيط اعرفي ان سمعتك بتروح في يوم وليلة
ووش عند الانسان اهم من سمعته ؟
اسفة على الاطالة وعلى هذرتي الكثيره